महा भूकम्पका पीडितहरुलाई राहत वितरण कार्यक्रम सम्पन्न

हाम्रो मातृभुमि नेपालमा गत २५ अप्रिल तथा १२ मे २०१५ मा गएको महा-भूकम्पबाट पर्न गएको धन जनको क्षतिप्रति संस्था, संस्थाका सदस्य तथा शुभचिन्तक महानुभाबहरु गहिरो दुखमा पर्नुभएको छ यस असहज तथा दुखित घडीमा धैर्य धारण तथा असहज परिस्थितिको सामना गर्ने बल प्रदानका साथै दुखद परिस्थितिबाट सहादत प्राप्त गर्नुहुने सम्पूर्ण नेपाली तथा बिदेशी चिर आत्माको शान्तिका लागि भगवान संग प्राथना गर्न चाहन्छौं |

यसरि धेरै असजिलो समय गुज्री रहदा नेपाली समाज वेल्स, बेलायत (Nepalese Society Wales, UK) को पहलमा राहत वितरणको पाईला अगाडी सारेको कुरा यहाँहरु सबैलाई जानकारी गराउन चाहन्छौं | यसैक्रममा नेपाली समाज वेल्स, बेलायत (Nepalese Society Wales, UK) ले भूकम्प पिडितहरुको सहयोगार्थ आर्थिक संकलन गरी अति प्रभावित क्षेत्रको पहिचान गरी उक्त क्षेत्रमा खाद्यान्‍न सहयोग गर्ने निर्णय बमोजिम दलित जनजातिहरुको बाहुल्यता रहेको गोरखा जिल्ला, हंसपुर गा. वि. स. अन्तर्गत वडा नं. १, ४, ५  र ८  गरी ४ वटा वडाका ४४० घर परिवारहरुलाई राहत वितरण गर्नको लागि नेपालबाट स्वयम् सेवकहरु खटाई संस्थाको ब्यानर मुनि पिडित जनताहरुलाई राहत स्वरुप खाद्यान्‍न सहयोग वितरण गर्‍यो।

संस्थाले उपलब्ध गराएको राहत कुनै बिकट क्षेत्रका पिडितहरुले पाउन भन्ने उदेश्यले आयोजना गरिएको यस राहत कार्यक्रमले स्थानीयबासिमा ठुलो सहयोग पुगेको ठहर छ | भूकम्पले तथा बर्षातले बिगारेको कच्ची बाटोका कारण राहत सहि ठाउमा पुर्याउन सकिन्छ कि सकिदैन भन्ने ठुलो चिन्ताका बाबजुद पनि सहि ठाउमा लगेर सहि तरिकाले राहत वितरण गर्न पाउँदा राहत वितरण टोलि ज्यादै हर्षित रहेको छ भने सबैले बिकट ठाउँ भन्दै पन्छिदै गरि रहेको बेला यसरि राहत उपलब्ध गराएर सहयोग गरेकोमा राहत वितरण टोलि तथा नेपाली समाज वेल्स, बेलायत (Nepalese Society Wales, UK) प्रति स्थानीयवासीहरु धेरै गौरवान्वित रहेका छन् |

राहत वितरण कार्यक्रम मे ९, १०, र ११ गरि तिन दिनमा सम्पन्न गरिएको थियो | भोक, तिर्खा र दुखलाई एकातिर पन्छाएर राहत वितरणमा हरतरहले सहयोग पुर्याउनुहुने महानुभाबहरु श्री अमृत पोखरेल, बसेनी, चितवन; श्री माधव अधिकारी, हंसपुर वडा नं. १, हाल पोखरा; श्री रामप्रसाद अधिकारी, हंसपुर वडा नं. ५ हाल काठमाण्डौ; श्री कुशल अधिकारी, हंसपुर वडा नं. ५ हाल काठमाण्डौ; श्री मुक्ति पोखरेल, भरतपुर, चितवन; श्री सिर्जन पोखरेल, भरतपुर, चितवन; श्री सुदिप दवाडी, बिचौर गा वि स, लमजुङ्; श्री राजेन्द्र पोखरेल, छोप्राक-२, गोरखा हाल काठमाण्डौ र अन्य २ जना हंसपुर गाविसका स्थानीय महानुभाबहरुहरु प्रति संस्था हार्दिक आभार व्यक्त गर्दछ | यसका साथै आर्थिक सहयोग संकलनमा मद्दत पुर्याई यस राहत कार्यक्रमलाई सफल पार्न सहयोग गर्नुहुने सम्पूर्ण वेल्स तथा बेलायत निवासी दाजुभाई तथा दिदीबहिनीहरु र अन्य संस्थाहरुप्रति नेपाली समाज वेल्स, बेलायत (Nepalese Society Wales, UK) हार्दिक कृतज्ञता व्यक्त गर्दछ | 

राहत वितरणको अन्य दृश्यहरुको लागि यहाँ क्लिक गर्नुहोस, धन्यवाद !